Mazkur maqolada ingliz va o‘zbek tillarida rang-tusni ifodalovchi sifat komponentlari asosida shakllangan frazeologik va turg‘un birikmalarning lingvomadaniy xususiyatlari qiyosiy aspektda tadqiq etiladi. Rang bildiruvchi leksemalarning frazeologik birliklar tarkibida qo‘llanishi ularning nominativ vazifasi bilan cheklanib qolmay, muayyan xalqning milliy-madaniy tajribasi, dunyoni idrok etish modeli, mentaliteti, qadriyatlari va tarixiy tasavvurlarini ham aks ettirishi aniqlanadi. Tadqiqotda, xususan, ingliz tilidagi white komponentli birliklar semantik, konnotativ va lingvomadaniy jihatdan tahlil qilinadi hamda ularning o‘zbek tilidagi muqobillari bilan qiyoslanadi. Tahlil natijalari white rang leksemasining ingliz tilida nafaqat “oq rang” ma’nosini, balki poklik, ezgulik, beg‘arazlik, taslim bo‘lish, qutqaruv va ayrim holatlarda ortiqcha yoki iqtisodiy jihatdan foydasiz mulk kabi konnotativ ma’nolarni ham ifodalashini ko‘rsatadi. Rang komponentining frazeologik semantikadagi funksiyasi milliy-madaniy kontekst bilan uzviy bog‘liq bo‘lib, ayni rang turli lingvomadaniy makonlarda bir-biridan farqli assotsiativ mazmun kasb etishi mumkin.