Keyingi yillarda mamlakatimizda ona tili o‘qitish metodikasiga doir qator ilmiy-metodik tadqiqotlar olib borildi. Ona tili ta’limida ilk darsliklar shakllanishida A.Fitrat, O.Usmon, B.Avizov, Y.Abdullayev, M.Omilxonovalarning xizmati katta bo‘lgan, ammo darsliklarning dastlabki variantlarida o‘quv topshiriqlari berilmagan [1]. Sh.Yusupova va N.Yuldasheva tadqiqotlarida ona tilini yangi pedagogik texnologiyalar asosida o‘qitish masalalari tadqiq qilingan [1; 2]. A.G‘ulomov, M.Saidov va N.Alovuddinovalar esa ona tilini o‘qitish orqali mustaqil ishlash, ijodiy fikrlash ko‘nikmalarini shakllantirish metodikasi ustida izlanishlar olib borgan [3; 4; 5]. X.Muxitdinova ta’lim bosqichlarida uzviylikni ta’minlashning lingvodidaktik asoslarini ishlab chiqishga oid tadqiqotini olib borgan [6]. Qayd qilingan ushbu tadqiqot ishlarida o‘quv topshiriqlarining turlari, matnni o‘qib tushunishga doir tavsiyalar, mashq va topshiriqlar, ulardan nutq o‘stirishda foydalanish masalalari ham yoritilgan. Maqolaning maqsadi – boshlang‘ich sinf o‘quvchilarida o‘qish savodxonligini rivojlantiruvchi o‘quv topshiriqlari ustida ishlash metodikasini nazariy asoslash va “Yetti xazinaning biri” mavzusi misolida amaliy mexanizmini ko‘rsatish.